News Khmers

ប្រភព៖ កម្ពុជាថ្មី
ភ្នំពេញ ៖ ជនសង្ស័យម្នាក់ក្នុងចំណោមគ្នា៤ នាក់បន្ទាប់ពីធ្វើ សកម្មភាពស្ទាក់វាយប្លន់ យកកាបូបលុយ ពីជនជាតិសាំងហ្គាពួរ ហើយព្យាយាម គេចខ្លួនបាន១០ម៉ោង ក្រោយត្រូវបាន សមត្ថកិច្ចប៉ុស្តិ៍ ស្រះចកស្រាវ ជ្រាវឃាត់ ខ្លួនដកហូត បានវត្ថុតាង ខ្លះៗជារបស់ជនរងគ្រោះមកវិញ។
លោកកាន់ វណ្ណៈនាយនគរបាលប៉ុស្តិ៍ស្រះចកបានអោយដឹងថាជនសង្ស័យត្រូវឃាត់ខ្លួនបាននៅចំណុចមុខក្ដាន់២ សង្កាត់ស្រះចក ខណ្ឌដូនពេញ កាលពីវេលាម៉ោង ១និង៣០នាទីរំលងអធ្រាត្រឈានចូលថ្ងៃទី ០៥ កក្កដា ២០១៣នេះ។
ជនសង្ស័យដែលឃាត់ខ្លួននេះឈ្មោះ ធី សុវណ្ណរ៉ា ភេទប្រុសអាយុ ២០ឆ្នាំ មុខរបរមិនពិតប្រាកដ ស្នាក់នៅផ្ទះលេខ៤៩ ក្រុម៣៩ ភូមិ៣ សង្កាត់ស្រះចក ខណ្ឌដូនពេញ។ លោកនាយប៉ុស្ត៍ស្រះចកបានបន្តថា ជនរងគ្រោះមានឈ្មោះ GOH KUAN YENG JASON ភេទប្រុស អាយុ ២៥ឆ្នាំ មុខរបរទេសចរណ៍ស្នាក់នៅផ្ទះសំណាក់ សង្កាត់វត្តភ្នំ ខណ្ឌដូនពេញ។
គួរបញ្ជាក់ថា កាលពីវេលាម៉ោង ២១ និង ៣០ នាទីយប់ ថ្ងៃទី០៣ ខែកក្កដា ឆ្នាំ២០១៣ នៅចំណុចផ្លូវសហព័ន្ធរុស្ស៊ី ក្នុងសង្កាត់ស្រះចក ខណ្ឌដូនពេញ មានក្រុមជនសង្ស័យមានគ្នា ៤នាក់ ស្ទាក់វាយប្លន់យកកាបូបលុយបុរសសាំងហ្គាពួរបណ្ដាលអោយបាត់បង់លុយជាង៣០០ដុល្លារអត្តសញ្ញាណបត្រ លិខិតឆ្លងដែន និងលិខិតផ្សេងៗទៀត ខណៈជនបរទេសរូបនោះដើរតែឯងម្នាក់កន្លែងស្ងាត់ ហើយក្រោយពីកើតហេតុបុរសជនជាតិសាំងហ្គាពួរបានមកប្ដឹងនគរបាលប៉ុស្តិ៍ស្រះអោយជួយយអន្តរាគមន៍ ភ្លាមៗសមត្ថកិច្ចបានចេញអន្តរាគមន៍ដើម្បីកំណត់មុខសញ្ញាក្រោយពីធ្វើសកម្មភាពបានរយៈពេលជាង១០ម៉ោងក៏ត្រូវបានសមត្ថកិច្ចស្រាវជ្រាវឃាត់ជនសង្ស័យបានម្នាក់តែម្តងរួមទាំងដកហូតវត្ថុតាងឯកសាររបស់ជនរងគ្រោះមកវិញ។ ចំណែកលុយកាក់ជនសង្ស័យចាវវាយអស់ហើយ។
បច្ចុប្បន្នជនសង្ស័យកំពុងឃាត់ខ្លួននៅប៉ុស្តិ៍ស្រះចកដើម្បីសួរនាំ និងបញ្ជូនបន្តទៅអធិការដ្ឋានខណ្ឌដូនពេញ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធីច្បាប់ រីឯបក្ខពួកដែលនៅសេសសល់កំពុងស្រាវជ្រាវចាប់ខ្លួនបន្តទៀត៕
រស្មី