ឈើប្រណិតដឹកគគ្រឹកគគ្រែង ប្រជែងយុទ្ធនាការបោះឆ្នោត

Posted by : Unknown วันอาทิตย์ที่ 30 มิถุนายน พ.ศ. 2556

ប្រភព អង្គរធំមេឌា
មណ្ឌលគិរី៖ ឆ្លៀតឱកាសក្នុងពេលបើកយុទ្ធនាការឃោសនា រកសម្លេងឆ្នោតរបស់គណបក្សនយោបាយមួយចំនួននោះ ពួកឈ្មួញ ដែលនិយមរកស៊ីបទល្មើសព្រៃឈើ បាននាំគ្នា ដាក់ម៉ាស៊ីនយន្តត្រង់ទីន័រ ជាច្រើនគ្រឿង ចូលកាប់ និងដឹកជញ្ជូនឈើប្រណិត យកមកលក់ឲ្យតាមបណ្តាក្រុមហ៊ុន ដែលទទួលបានដីព្រៃវិនិយោគ ពីរាជរដ្ឋាភិបាល យ៉ាងអនាធិបតេយ្យ មិនមានសមត្ថកិច្ចជំនាញណាបង្ក្រាបនោះឡើយ។
ប្រភពបានរាយការណ៍ថា យ៉ាងហោចណាស់ ក្នុងមួយថ្ងៃ ក៏មានរថយន្តប្រភេទអាដំរីទឹក.អារ៉ាល់ រួមនិងរថយន្តកែច្នៃជាងដប់គ្រឿងដែរ បានដឹកឈើប្រណិតប្រភេទធ្នង់ចេញពីព្រៃការពារគ្រប់គ្រងដោយអង្គការWWS រួមនិងព្រៃដែនជម្រកសត្វភ្នំព្រិច គ្រប់គ្រងដោយមន្ត្រីបរិស្ថាន ស្ថិតក្នុងទឹកដីស្រុកកោះញ៉ែក ខេត្តមណ្ឌលគិរី។
ប្រភពបានឲ្យដឹងទៀតថា ក្រុមឈ្មួញរកស៊ីកាប់ និងដឹកជញ្ជូនឈើប្រណិតល្មើសច្បាប់យូរឆ្នាំ យ៉ាងដុះស្លែ នៅក្នុងព្រៃក្នុងទឹកដីស្រុកកោះញ៉ែក នោះ មានឈ្មោះ ម៉ិច មានតួនាទីជាទាហាន វរៈលេខ១ ចំណុះឲ្យតំបន់ប្រតិបត្តិការសឹកខេត្តមណ្ឌលគិរី ឈ្មោះឡែក ជាអធិការរងនគរបាលស្រុកកោះញ៉ែក រួមនិងឈ្មោះ វី អតីតជាមេបញ្ជាការអាវុធហត្ថស្រុកកោះញ៉ែក។

ការដឹកជញ្ជូនឈើប្រណិតរបស់ឈ្មួញទាំងនោះ បានយកទៅលក់ឲ្យក្រុមហ៊ុនមានឈ្មោះដូនពេញ ដែលមានទីតាំងនៅក្នុងទឹកដីស្រុកលុងផាត់ ខេត្តរតនគិរីរួមនិងក្រុមហ៊ុនរបស់តា៩៥ ឋិតក្នុងទឹកដីស្រុកកោះញ៉ែកខេត្តមណ្ឌលគិរី៕