ខ្មែរអ៊ីស្លាម ព្រួតវ៉ៃកម្មករជនជាតិខ្មែរ រងរបួសធ្ងន់ធ្ងរ ក្នុងវង់ផឹកស៊ី

Posted by : Unknown วันเสาร์ที่ 29 มิถุนายน พ.ศ. 2556

ស្ទឹងត្រែង: សមត្ថកិច្ចកងរាជអាវុធហត្ថ នៅព្រឹកថ្ងៃទី២៨ ខែមិថុនា ឆ្នាំ២០១៣ បានបញ្ជូនសំណុំរឿងជនសង្ស័យខ្មែរអ៊ីស្លាមពីរនាក់ ទៅតុលាការខេត្ត ពាក់ព័ន្ធបង្កឱ្យជនជាតិខ្មែរម្នាក់ រងបួសជាទម្ងន់ កាលពីយប់ថ្ងៃទី២៦ ខែមិថុនា ស្ថិតនៅម្តុំចំណុចអូរពងមាន់ ក្រុងស្ទឹងត្រែង។

សមត្ថកិច្ចនិយាយថា មនុស្សពីរនាក់ត្រូវបានឃាត់ខ្លួន ទី១.ឈ្មោះ អែល ហ្វាស៊ីន ភេទប្រុស អាយុ ២០ឆ្នាំ ក្រោមបទចោទប្រកាន់ប្រព្រឹត្តអំពើហឹង្សាដោយចេតនា ទៅលើជនរងគ្រោះ យោងតាមច្បាប់ក្រមព្រហ្មទណ្ឌ។ ទី២.ឈ្មោះ តាំ លី ភេទប្រុស អាយុ ៤២ឆ្នាំ ត្រូវបានឃាត់ខ្លួនដោយសារយកឈ្មោះឧត្តមសេនីយ៍ត្រី ស្វាយ ញ៉ន មេបញ្ជាការសឹករងខេត្ត មកគំរាមសមត្ថកិច្ច ពេលចុះបង្ក្រាបជនល្មើស។ ឈ្មោះ តាំ លី គឺជាអ្នករារាំងសមត្ថកិច្ច ហើយបណ្តោយឱ្យចៅរបស់គាត់ឈ្មោះ ស្លេះ ម៉ាគីន ជនដៃដល់រត់គេចខ្លួន។ រីឯជនរងគ្រោះឈ្មោះ ផៃ ខ្នុយ ភេទប្រុស អាយុ ១៩ឆ្នាំ ជនជាតិខ្មែរ ជាកម្មករសំណង់ មានស្រុកកំណើតនៅភូមិតាសំ ឃុំបឹងត្រាញ់ខាងត្បូង ស្រុកសំរោងខេត្តតាកែវ។
លោក ស៊ីវ សាម៉េត កងរាជអាវុធហត្ថ ខេត្តស្តឹងត្រែង បានឱ្យដឹងថា មុនពេលកើតហេតុជនរងគ្រោះ ឈ្មោះ ផៃ ខ្នុយ រួមនិងមិត្តភក្តិផ្សេងទៀតកំពុងផឹកស៊ី។
ដោយឡែកជនដៃដល់ជាកូនខ្មែរអ៊ីស្លាមមួយក្រុម បានមកនិយាយឌឺដង ដាក់ក្រុមជនរងគ្រោះ ធ្វើឱ្យទាស់សម្តី រហូតជ្រុលទាញដបស្រានឹងដងចបវ៉ៃគ្នា ដូចហ្វូងគោ ផ្អើលឈុលទាំងយប់តែម្តង។
ក្រោយមកសមត្ថកិច្ចបានបញ្ជូនជនរងគ្រោះ មកកាន់មន្ទីរពេទ្យបង្អែកខេត្តស្ទឹងត្រែង រួចប្រគល់ឱ្យសាច់ញាតិបញ្ជូនបន្តទៅព្យាបាលនៅភ្នំពេញ ដោយសារមុខរបួសធ្ងន់ធ្ងរពេក។
ជនសង្ស័យទាំងពីរនាក់ខាងលើ ត្រូវបានចោទប្រកាន់ក្នុងបទល្មើសដាច់ដោយឡែកពីគ្នា រួចបញ្ជូនសំណុំរឿង ទៅសាលាដំបូង ដើម្បីស៊ើបអង្កេតស្វែងរកចាប់ខ្លួនមនុស្សមួយចំនួនទៀត៕
ប្រភព CEN