News Khmers

ប្រភព ដើមអម្ពិល
បាត់ដំបងៈ កម្លាំងនគរបាលជំនាញ ការិយាល័យប្រឆាំងគ្រឿងញៀនខេត្ត បានធ្វើការឃាត់ខ្លួនយុវសិស្សម្នាក់ និងរឹបអូសបានថ្នាំញៀន ប្រភេទ ម៉ាទឹកកក ១ថង់តូច កាលពីវេលាម៉ោង៥ ល្ងាចថ្ងៃទី៤ ខែកក្កដា ឆ្នាំ២០១៣ នៅតាមដងផ្លូវ ស្ថិតក្នុងភូមិវត្តតាមិម ឃុំអូរដំបង១ ស្រុកសង្កែ ពីបទចែក ចាយថ្នាំញៀន នាំយកមកការិយាល័យជំនាញ ដើម្បីសាកសួរ រួចកសាងសំណុំរឿង បញ្ជូនខ្លួនជនសង្ស័យ និងវត្ថុតាង ទៅតុលាការខេត្ត ដើម្បីចាត់ ការបន្តតាមច្បាប់។
លោកវរសេនីយ៍ត្រី ខៀវ ឈឿត នាយស្តីទីការិយាល័យ ប្រឆាំងគ្រឿងញៀនខេត្ត បានឲ្យដឹងថា ជនសង្ស័យ ដែលសមត្ថកិច្ចឃាត់ខ្លួន មានឈ្មោះ គង់ ដូល្លា ភេទប្រុស អាយុ ១៩ឆ្នាំ ជាសិស្សរៀនថ្នាក់ទី១២ នៅវិទ្យាល័យ នេត យ៉ង់ មានទីលំនៅភូមិវត្តតាមិម ឃុំអូរដំបង១ ស្រុកសង្កែ ខេត្ត បាត់ដំបង។
តាមកំណត់ហេតុ សួរចម្លើយ របស់សមត្ថកិច្ច បានបញ្ជាក់ថា មុនពេលឃាត់ខ្លួន នៅម៉ោង៤ជាងរសៀល ការិយាល័យជំនាញ បានទទួលព័ត៌មានថា មានករណីចែកចាយថ្នាំញៀន កម្លាំងជំនាញ បាននាំកម្លាំង១ក្រុម ចុះឃាត់ខ្លួន ខណៈជនសង្ស័យ កំពុងជិះម៉ូតូ១គ្រឿង យកថ្នាំញៀនទៅឲ្យម៉ូយ ព្រមទាំងបានឆែកឆេរ រកឃើញថ្នាំញៀន ប្រភេទម៉ាទឹកកក១ថង់ តូចស្មើនិង០.១៧ក្រាម និងទូរស័ព្ទ១គ្រឿង នាំយកមកសាកសួរ នៅការិយាល័យ ជំនាញ។
ជនសង្ស័យ បានឆ្លើយសារភាពថា ខ្លួនពិតជាបានទទួលកាន់ថ្នាំញៀន យកទៅចែកចាយ ឲ្យម៉ូយពិតប្រាកដមែន ដោយគ្រាន់បានចំណេញ និងយក លុយមកទិញថ្នាំញៀន មកប្រើប្រាស់ខ្លួនឯងផង ហើយមិនទាន់បានលក់ឲ្យគេផង ក៏ត្រូវសមត្ថកិច្ចចាប់ខ្លួន បានតែម្តង។
លោក វរសេនីយ៍ត្រី ខៀវ ឈឿត បានបញ្ជាក់ថា យោងតាមបទល្មើស និងរឹបអូសបានវត្ថុតាងជាក់ស្តែង ព្រមទាំងចម្លើយសារភាព របស់ជនសង្ស័យ រួចមក ស្នងការនគរបាលខេត្ត លោក ស ថេត បានបញ្ជាឲ្យការិយាល័យជំនាញ កសាងសំណុំរឿងបញ្ជូនខ្លួន ជនសង្ស័យនិងវត្ថុតាង ទៅតុលាការ ខេត្ត នៅរសៀលថ្ងៃទី៦ ខែកក្កដា ឆ្នាំ២០១៣នេះ ដើម្បីចាត់ការបន្តតាមច្បាប់៕