ព្រីម លីហ្សា អួតពីមន្តស្នេហ៍ប្រុសរោមច្រើន

Posted by : Unknown วันอาทิตย์ที่ 7 กรกฎาคม พ.ศ. 2556

ភ្នំពេញ : ក្រៅពីល្បីខាងប្រើប្រាស់សម្ភារផ្ទាល់ខ្លួនដែល មានតម្លៃខ្ពស់ៗ ដូចតារាហូលីវូដនោះតារាសម្តែងសិចស៊ីកូនកាត់បីសាសន៍នាងព្រីម លីហ្សា ក៏លេចធ្លោផងដែរអំពីមន្តស្នេហ៍អន្ទងចិត្តឲ្យបុរសៗឈ្លក់វង្វេងនឹង សាច់សខ្ចីសិចស៊ីរបស់នាងជាមួយគ្នានោះខ្លួននាងផ្ទាល់ក៏បាន អះអាងដែរថា នាងមានបុរសៗស្រឡាញ់នាងច្រើនៗមែនទែន ពិសេសបុរសៗនៅក្រៅប្រទេស។
ក្នុងវ័យ២០ឆ្នាំតារាសម្តែងស្រីសិចស៊ីវ័យក្មេងសាច់សដូច បណ្តូលចេកត្រូវបានគេដាក់ងារជាតារាពូកែអួតសម្ភារប្រើប្រាស់ទំនើប ៗដើម្បីសម្ញែងពីភាពហ៊ឺហាស៊ីវិល័យតាមបែបសម័យទំនើបខណៈដែលតារា ស្រីឯទៀតនៅមិនទាន់ធ្វើបានដូចនោះ។ កញ្ញា ព្រីម លីហ្សា បានធ្វើឲ្យបុរស ជាច្រើនមានទាំងអ្នករស់នៅក្នុងស្រុកនិងក្រៅស្រុកតែងប្រាថ្នាចង់ បាននាងយកទៅឃុំគ្រងធ្វើជាម្ចាស់បេះដូង។
ប៉ុន្តែយ៉ាងណា មកដល់ពេលនេះនៅមិនទាន់មានបុរសណាម្នាក់មានសំណាងបានបេះដូងតារា ក្មេងខ្ចីរូបនេះជាកម្មសិទ្ធិដាច់មុខឡើយ ខណៈបានត្រឹមតែល្បីថាបុរសៗទាំងនោះហ៊ានត្រឹមតែឃ្វាលតែខាងក្រៅ របង មិនទាន់ហ៊ាននាំចាស់ទុំចូលដល់ក្នុងផ្ទះ។ស្រដៀងគ្នានោះ ក៏មានប្រភពព័ត៌មានដែលនៅជិតស្និទ្ធជាមួយនឹងតារាសម្តែងសិចស៊ី នាងព្រីមលីហ្សាបានបង្ហើបប្រាប់ថាពេលនេះនាង កំពុងតែស្ថិតក្នុងក្រសែភ្នែកបុរសអាណិកជនខ្មែររស់នៅអាមេរិក វ័យល្បាក់៣០ឆ្នាំ ខណៈដែលបុរសម្នាក់នោះសម្លឹងនាងក្នុងគម្រោងធ្វើជាដៃគូជីវិតទៅ ថ្ងៃអនាគតទៀតផង។
ប្រភពដដែលនោះ បានបញ្ជាក់ទៀតថា៖ «បុរសម្នាក់នេះបានតាមលួចស្រឡាញ់លីហ្សាជាងមួយឆ្នាំមកហើយហើយគេ នោះក៏ចង់នាំចាស់ទុំចូលមកស្តីដណ្តឹងនាងធ្វើជាគូគ្រងទៅថ្ងៃ អនាគតដែរ តែគ្រាន់ថាមិនទាន់មានឱកាសដើម្បីសារភាពពីការស្រឡាញ់នេះទៅ ប្រាប់នាង ព្រីម លីហ្សាដោយផ្ទាល់»។
នេះមិនមែនទើបតែជាលើកទីមួយទេដែលព្រីមលីហ្សាល្បីមានអ្នកតាម ស្រឡាញ់និងចង់នាំចាស់ទុំចូលស្តី ប៉ុន្តែជារឿយៗនាងតែងតែចេញមុខបដិសេធថានាងមិនទាន់ចង់គិតគូរពី រឿងនេះនៅឡើយទេ ព្រោះចង់នៅប្រឡូកក្នុងការងារសិល្បៈឲ្យបានល្បីជាងនេះ។
លើកនេះក៏មិនខុសពីលើកមុនដែរ នាងបានប្រាប់ភ្នំពេញប៉ុស្តិ៍ថា៖ «មិនទាន់ដល់ពេលដែលខ្ញុំត្រូវគិតពីរឿងហ្នឹងទេ»។
នាងថ្លែងទៀតថា៖ «រឿងអ្នកណាស្រឡាញ់ខ្ញុំចង់រៀបការជាមួយខ្ញុំនោះ ជារឿងគេតែម្នាក់ឯងទេ ចំណែកខ្ញុំខ្ញុំមិនទាន់អាចទទួលយកបានទេ»។
ជាមួយការប្រកាសខ្លួនមិនទាន់ចង់រស់នៅក្រោមកម្មសិទ្ធិបេះដូង បុរសណាម្នាក់នោះ តារាសម្តែងដែលមានទីផ្សារក្រៅទូលាយជាងក្នុងស្រុករូបនេះក៏បាន អះអាងដែរថា៖ «មិនមែនមានតែបុរសអាណិកជននៅអាមេរិកមួយទេ ដែលតាមស្រឡាញ់ខ្ញុំ នៅមានអ្នកផ្សេងហើយច្រើនទៀត។ តែក្នុងចំណោមពួកគាត់ទាំងអស់នោះ ខ្ញុំមានត្រឹមតែការរាប់អានទេ តែរឿងផ្សេងជ្រុលពីនេះមិនមានឡើយ»។
ក្នុងពាក្យសម្ដីរៀបរាប់លាយឡំនឹងសំណើចកក្អឹកនោះ នាងក៏បានសារភាពប្រាប់ពីរឿងកន្លងផុត ទៅដែរថា៖ «កាលពីពេលកន្លងទៅក៏មានបុរសអាណិកជនខ្មែរម្នាក់វ័យក្រោម៣០ឆ្នាំ ធ្លាប់បាននាំចាស់ទុំមកស៊ើបសួរចង់ចូលស្តីដណ្តឹងខ្ញុំដែរ តែខ្ញុំបានប្រាប់ម៉ាក់ថា ខ្ញុំមិនទាន់គិតទេ ហើយគេក៏ទៅវិញ»។
នាងបានប្រាប់ទៀតថា៖ «បុរសម្នាក់នោះមិនមែនជាអាណិកជនដែលល្បីចង់បានខ្ញុំពេលនេះទេ»។
ប៉ុន្តែនាងក៏បានបញ្ជាក់ដដែលទៀតថា៖ «សព្វថ្ងៃបើថា ខ្ញុំបង្ហើបថា ឲ្យចូលមកដល់ពេលដែលខ្ញុំគិតគូរពីរឿងនេះ នោះ ប្រហែលជាមិនខ្វះទេ អ្នកចង់ចូលមកនេះបើតាមខ្ញុំខ្លួនឯងដឹង»៕