News Khmers

ប្រភព CEN
សៀមរាប: អ្នកភូមិប្រមាណជិត ១០០ នាក់ មកពីភូមិចំនួន ៤ នៃស្រុកបន្ទាយស្រី នៅព្រឹកថ្ងៃទី៣ ខែកក្កដា បានលើកគ្នាមកតវ៉ាឲ្យអាជ្ញាធរ ខេត្តជួយដោះស្រាយដីទំនាស់ ៧៩៥ ហិចតា ប៉ុន្តែក្រុមអ្នកភូមិបានវិលទៅមូលដ្ឋានរៀងខ្លួនវិញ នៅព្រឹកថ្ងៃដដែល បន្ទាប់ពីមន្ត្រីសាលាខេត្ត បានសម្របសម្រួល។
  
ភូមិទាំង ៤ ដែលមានដីទំនាស់ រួមមាន ភូមិស្គន់មានដី ១២០ ហិចតា ភូមិត្បែងខាងលិច ៤២៧ ហិចតា ភូមិតាពេន ៩០ ហិចតា និងភូមិតានី ១៥៨ ហិចតា។
ក្រុមអ្នកភូមិ ដែលធ្វើដំណើរដោយគោយន្តកន្ត្រៃ ចំនួន ៦ គ្រឿងនោះ សមត្ថកិច្ចពុំបានអនុញ្ញាតឲ្យចូលទៅកាន់ក្រុងសៀមរាបទេ គឺនៅចរចាគ្នាត្រឹមតែចំណុចរង្វង់មូល ស្រុកបន្ទាយស្រី។

ក្នុងខណៈពេលកំពុងប្រមូលផ្តុំគ្នា បំពងសំឡេងដោយមីក្រូ នៅចំណុចរង្វង់មូល ស្រុកបន្ទាយស្រី អភិបាលស្រុក និងនាយក ប្រតិបត្តិ សាលាខេត្តបានចុះទៅដល់។ ការចរចាគ្នាអំពីការលើកហេតុផល របស់ក្រុមអ្នកភូមិអស់រយៈពេលជាច្រើនម៉ោង ក្រុមអ្នកភូមិក៏បានបំបែកហ្វូង វិលទៅផ្ទះរឿងខ្លួនវិញ។
  
ក្នុងការជំនួបនោះ លោក លី សំរិទ្ធ នាយកប្រតិបត្តិ សាលាខេត្តសៀមរាប បានលើកឡើងថា ទោះក្នុងករណីណា អាជ្ញាធរនឹងដោះស្រាយជូនបងប្អូន។ ដូច្នេះតំណាង ភូមិទាំង ៤ ត្រូវប្រមូកឯកសារឲ្យបានគ្រប់គ្រាន់ ហើយរសៀលថ្ងៃទី៣ខែកក្កដានេះ អភិបាលរងខេត្ត លោក នូ ផល្លា ចុះទៅដោះស្រាយដល់ភូមិតែម្តង។

គួរបញ្ជាក់ថា ក្រុមអ្នកភូមិខាងលើនេះ ធ្លាប់បានលើកគ្នាមកបិទផ្លូវជាតិលេខ៦ម្តងហើយ នៅចំណុចខាងកើតផ្សារអង្គ្រង ដើម្បីបង្ខំឲ្យអាជ្ញាធរដោះស្រាយដីទំនាស់របស់ពួកគេ។ ចំណែកឯលទ្ធផលយ៉ាងណានោះគឺ អាចដឹងនៅរសៀលថ្ងៃទី៣កក្កដានេះ បន្ទាប់ពីអាជ្ញាធរខេត្តចុះទៅដោះស្រាយដល់ភូមិកើតហេតុ៕