អ្នកបើកបរស្លាប់ ពេលដាក់អីវ៉ាន់លៀនចេញមកក្រៅទ្រុងរ៉ឺម៉ក ត្រូវរថយន្តធំបើកគៀរដួលបោកក្បាល

Posted by : Unknown วันอาทิตย์ที่ 30 มิถุนายน พ.ศ. 2556

ប្រភព៖ CEN
កំពង់ឆ្នាំង: បុរសអ្នកបើកបររ៉ឺម៉កម៉ូតូម្នាក់ បានស្លាប់ភ្លាមៗនៅនឹងកន្លែងកើតហេតុ រីឯប្រពន្ធ និងកូនពីរនាក់បានរួចផុតពីគ្រោះថ្នាក់ ពេលដាក់អីវ៉ាន់លៀនចេញមកក្រៅទ្រុងរ៉ឺម៉ក ហើយត្រូវរថយន្តធំបើកគៀរដួលបោកក្បាល កាលពីវេលាម៉ោង៨និង៤៥នាទី ព្រឹកថ្ងៃទី៣០ ខែមិថុនា ឆ្នាំ២០១៣ នៅលើកំណាត់ផ្លូវជាតិលេខ៥ ក្នុងភូមិចាថ្មី ឃុំអណ្តូងស្នាយ ស្រុករលាប្អៀរ ខេត្តកំពង់ឆ្នាំង។

ជនរងគ្រោះក្នុងហេតុការណ៍គ្រោះថ្នាក់ចរាចរណ៍នេះ ឈ្មោះហែម អុល ភេទប្រុស អាយុ៥១ឆ្នាំ មានទីលំនៅក្នុងឃុំកំពង់ព្រះ ស្រុកសង្កែ ខេត្តបាត់ដំបង។
នៅកន្លែងកើតហេតុ ប៉ូលិសចរាចរណ៍បានអោយដឹងថា ក្រុមគ្រួសាររងគ្រោះ មានមុខរបរដើរលក់អីវ៉ាន់នៅតាមបុណ្យ និងពិធីផ្សេងៗ។ គាត់បានធ្វើដំណើរពីខេត្តកំពង់ស្ពឺ ឆ្ពោះទៅកាន់លំនៅដ្ឋានរបស់គាត់នៅឯខេត្តបាត់ដំបង ដោយមានប្រពន្ធនិងកូនពីរនាក់រួមដំណើរជាមួយផងដែរ។ នៅពេលមកដល់ចំណុចកើតហេតុ មានរថយន្តធុនធំមួយគ្រឿង បើកក្នុងទិសដៅច្រាសគ្នា បានបើកមកគៀរអីវ៉ាន់ដែលជនរងគ្រោះដាក់លៀនចេញពីទ្រុងរ៉ឺម៉កផ្នែក ខាងក្រោយ បណ្តាលអោយកាច់ម៉ូតូដួលបោកក្បាលជនរងគ្រោះផ្ទប់ទៅនឹងថ្នល់ជាតិពេញ មួយទំហឹង បែកទាំងមួកការពារសុវត្ថិភាព ស្លាប់ភ្លាមៗនៅនឹងកន្លែងកើតហេតុ រីឯប្រពន្ធនិងកូនរួចផុតពីគ្រោះថ្នាក់ ។

រថយន្តបង្ក សមត្ថកិច្ចនៅមិនទាន់ស្គាល់អត្តសញ្ញាណនៅឡើយទេ ពីព្រោះនៅពេលបុករ៉ឺម៉កម៉ូតូជនរងគ្រោះហើយ មិនឈប់ទទួលខុសត្រូវឡើយ អ្នកបើកបរថយន្តនោះ បានបន្ថែមល្បឿនរត់គេចបាត់ស្រមោលតែម្តង៕