ប្រាំឆ្នាំ នៃទំនាក់ទំនងកម្ពុជា និងថៃ ពីជម្លោះ មករកសហប្រតិបត្តិការ

Posted by : Unknown วันเสาร์ที่ 29 มิถุนายน พ.ศ. 2556

ប្រភព CEN
ភ្នំពេញ: រដ្ឋាភិបាលកម្ពុជា កត់សម្គាល់ការលំបាកនៅក្នុងទំនាក់ទំនង ជាមួយថៃ ក្នុងរយៈពេលប្រាំឆ្នាំកន្លងមក។
របាយការណ៍របស់រដ្ឋាភិបាលកម្ពុជា បានធ្វើការកត់សម្គាល់អំពីការប្រែប្រួល នៃទំនាក់ទំនងរវាងកម្ពុជា និងថៃ នៅក្នុងរយៈពេលប្រាំឆ្នាំកន្លងមក ដោយវាយតម្លៃអំពីចំណុចរបត់វិជ្ជមាន ក្រោយពីរដ្ឋាភិបាលថៃថ្មី ត្រូវបានបង្កើតឡើង។

បន្ទាប់ពីធ្វើការចរចាត្រូវគ្នា ទាហានកម្ពុជា ដកទ័ពចូលបន្ទាយវិញ ក្រោយពេលប៉ះទង្គិចគ្នាមួយប្រាវនៅប្រាសាទព្រះវិហារ ជាមួយទាហានថៃ កាលពីថ្ងៃទី៧ ខែកក្កដា ឆ្នាំ២០០៨

របាយការណ៍នោះ បាននិយាយថា សភាពការណ៍សន្តិសុខនៅទូទាំងព្រះរាជាណាចក្រកម្ពុជា ពុំមានបញ្ហាអ្វីដែលគួរឲ្យកត់សម្គាល់ឡើយ ក៏ប៉ុន្តែនៅតាមតំបន់ព្រំដែនកម្ពុជា-ថៃ មានការកើតឡើងនូវជម្លោះព្រំដែន ដែលទាហានថៃបានបង្កឡើង នៅតំបន់ប្រាសាទព្រះវិហារ និងតំបន់មួយចំនួនទៀត ចាប់ផ្តើមពីថ្ងៃទី១៥ ខែកក្កដា ឆ្នាំ២០០៨ ក្រោយ ពេលដែលប្រាសាទព្រះវិហាររបស់កម្ពុជា ត្រូវបានដាក់បញ្ចូលជាសម្បត្តិបេតិកភណ្ឌពិភពលោកនៅថ្ងៃទី៧ ខែកក្កដា ឆ្នាំ២០០៨។
របាយការណ៍និយាយទៀតថា កងកម្លាំងប្រដាប់អាវុធ នៃព្រះរាជាណាចក្រកម្ពុជា ការពារបូរណភាពទឹកដី បានយ៉ាងរឹងមាំ ហើយជម្លោះនេះ មានសភាពធូរស្រាល ក្រោយពេលប្រទេសថៃ មានរាជរដ្ឋាភិបាលថ្មី ដែលដឹកនាំដោយគណបក្សភឿថៃ។ ស្ថានការណ៍នៅតាមតំបន់ព្រំដែនបានវិលមករកភាពស្ងប់ស្ងាត់វិញ ទំនាក់ទំនងរវាងយោធាទាំងពីរប្រទេស ពិសេសនៅតំបន់ដែលមានភាពប្រសើរឡើង ជីវភាពប្រជាជនក៏បានវិលមករកភាពប្រក្រតីវិញដែរ។ ទន្ទឹមនេះ រាល់យន្តការដោះស្រាយបញ្ហាព្រំដែន ក៏កំពុងត្រូវបានជម្រុញប្រកបដោយភាពវិជ្ជមាន៕